Ing wekdal menika kita sampun ngancik ing wulan Rabiul Awwal, wulan wiyosanipun kanjeng Nabi Muhammad SAW.. Maulid Nabi minangka momentum penting tumarap kita kanggé ngémuti malih dhumateng panutan gesang kita. Handadosaken penjenenganipun minangka satunggaling sosok gegebengan, modèl perilaku menapa déné suri teladhan (uswah) ing salebeting semukawis panggesangan.
Satemenipun mapan ing salebeting dhiri Rasulullah SAW. wonten suri patuladhan ing babagan mangun baléwisma, bebrayan ageng, menapa déné mangun negari.
Allah subhanahu wa ta’ala sampun paring firman makaten:
لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ لِمَنْ كَانَ يَرْجُو اللَّهَ وَالْيَوْمَ الْآخِرَ وَذَكَرَ اللَّهَ كَثِيرًا
Satemené sira iku duwé panutan becik hiya iku Rasulullah (Muhammad), iku becik tumrap wong kang ngarep-arep ganjaraning Allah sarta wedi siksaning dina qiyamat. Apa déné wong kang akèh élingé ing Allah. (TQS al-Ahzab [33]: 21).
Para sedhèrèk Jamaah Jum’ah ingkang kinurmatan
Nabi SAW. minangka tiyang ingkang paling tekun mujâhadah-ipun salebeting ngibadhah. Sanajan panjenenganipun minangka sosok ingkang maksum (kalis saking dedosa) lan dipun jamin, mesthi mlebet suwarga. Mujâhadah ipun salebeting ngibadah menika murih panjenenganipun dados kawula ingkang kebak ing raos syukur.
Panjenenganipun minangka pribadi ingkang paling minulya akhlakipun. Aisyah radhiyallahu ‘anha nyebataken akhlak ipun kanjeng Nabi menika Al-Qur’an. Aisyah radhiyallahu ‘anha ngendika, “Rasulullah minangka tiyang ingkang paling minulya akhlakipun. Boten naté tumindak keji. Boten naté ngendika saru (misuh). Boten damel kisruh ing peken. Boten naté males mawi perkawis awon ingkang satraju. Ananging, panjenenganipun remen paring pangapunten lan pangampunan.” (HR Ahmad).
Panjenenganipun paling saé dhumateng para wanodya. Panjenenganipun ugi patuladhan ingkang paling saé dhumateng tetanggi, ingkang paling saé ing sesrawungan, kekancan menapa déné nindakaken muamalah. Ing sedaya perkawis kala wau, kita kadhawuhan supados handadosaken panjenenganipun minangka patuladhan lan model panutan.
Para sedhèrèk Jamaah Jum’ah ingkang kinurmatan
Mapanipun Rasulullah SAW. kaliyan Islamipun ing satengahing umat manungsa menika kanggé mangatur sedaya perkawis panggesangan. Saé menika ing salebeting bab akidah, ibadah, muamalah ngantos siyasah (politik).
Manuladhani Rasul SAW. boten namung ing babagan akidah, spiritual, moral lan sosial kémawon. Sebab menawi namung makaten, sami kémawon sampun mangerdilaken sosok panjenenganipun.
Mugi kagatosaken, panjenenganipun ugi paring patuladhan ing babagan kepemimpinan salebeting mangun negari, politik nglebet lan jawi negeri, nglampahaken pemerintahan, mangetrapaken hukum lan ngrampungaken persengkétaan. Allah subhanahu wa ta’ala paring firman makaten:
وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانتَهُوا وَاتَّقُوا اللَّهَ إِنَّ اللَّهَ شَدِيدُ الْعِقَابِ
….Samubarang kang diparengakè déning Rasul tampanana. Déné barang kang ora pareng padha tinggalen. Pada bektia ing Allah, awit Allah iku siksané abot. (TQS al-Hasyr [59]: 7).
Pramila kita ugi kedah totalitas handadosaken Rasulullah SAW. minangka panutan lan suri tauladhan salebeting sedaya aspèk, saé menika ing aspèk individu, keluwarga menapa déné negari; kajawi ing perkawis ingkang dados kekhususan panjenenganipun (khawâsh ar-Rasûl), kados ingkang sampun dipun terangaken déning para ulama ushul.
Para sedhèrèk Jamaah Jum’ah ingkang kinurmatan
BACA HALAMAN BERIKUTNYA..
